Sunday, January 29, 2006

Randang Pendiau Pengidup Timpang

Naka meh penyampau pemayuh jaku serbana urang didinga. Bisi nya serbana kasih sayau mantaika penyiru penyinu ngenang nasit; bisi mega nya jaku nundi seruran nyeriri rindu ngemeli; bisi mega jaku naka penajam mantap nengelam mai aki berunding dua tiga kali. Udah nasit udah selatan aku anak timpang baka pun pinang lung lai di puputka ribut lunda lundai, baka sengkenyang kediri ngelambai ba tisi serarai umai. Ahhh enti semengat tak bangat lemi baka tulang ikan lumi, lemah keru kerah baka ranggah, sigi tau rarat tau tesat kuing runding anak mensia. Tau tungkal tau kejal, tau mawa tau merana pendiau anak mensia idup di dunya. Engka amat meh sida ti beberita benama sikolujis ngelamatu nandangka pemalat kerarin pusin puting beliung tinggi begantung, endang sigi tau ngangkatka urat pun bungkang, matah numbangka tapang. Endang sigi belampung seribu pumpung betingkah langgung randang jalai pengidup. Udah nasit di agihka petara. Oppp anang guai! Nadai darah getah petara ngadaka aku deh! Quote-unquote darah getah apai, darah getah indai ti ngadaka aku!

Jalai ti dirembang aki gerubi pan enda meh bangat nyelai ari anak mensia ti sesama nasit dikembuan. Nadai apai benasitka indai tang suah nadai laban tudah indai, udah tembu terining, dikarapka perintah megai pengawa bejalaika undang undang pengelikun bansa enggau mensia. Ngarapka aki enggau ini. Benasit mega laban indai bisi menyadi indu beribun nyaga pendiau aki gerubi tang tajapan bakatu, bisi penguntung enggau pengerugi!..opportunity cost..ku sida ikonumis ehh.Ahh enti baka bejual bebeli diatu nyau betawar enggau aki ini nyekat enda nyuruh sida iya ngambi narit nuan pulai ke rumah panjai deh aunty indai oh mummy. Ketegal aku, pengawa urang bukai, pengawa nuan deh indai lumur dua tejanggul..mimpi nuan deka bepengawa perintah agrikalcha nulung bansa besabsidi bekebun getah bekebun lada semina tinggal nyadi mimpi. Ketegal aku, pendiau aku, penimpang aku, nuan di tarit pulai ari terining laban nadai urang beribun! I am sorry. Baru udah didinga bunyi merechun bungai merdeka kitai masuk Malaysia maya nya neh mummy...berapa iku meh kita ti indu bisi besekula nemu macha maya nya? Naka penyayau tang meh utai udah tekelanjur, baka asi udah nyadi bubur. Tuchum kediri mega tudah aku lebuh ngarang tu deh indai..udah nasit udah selatan. Enti nadai aku, engka enda mega nuan bekelala enggau siku soldadu askar satu renjer!!! Hehehehehe nyau mega nuan ngejangka menua pindah nuju menua Malaya laban apai tuai ti ngesan senjata ngetanka menua ari langgar munsuh. Ari tu mega pun aku nemu bechuntingka lupung kandi bup sekula enggau gelar nama 'Agi Idup Agi Ngelaban' ti meruan tebilang nyadi kenang sampai ke diatu.

Ngarapka aki seduai ini meh tu deh. Tudah ini, nama deh...ABC buta ngelantak kening pan enda meh ngelala tang benasit bisi aki ti bisi sekula enda tinggi...boleh tahan..nemu macha nemu ngira ngiring tudah aku masuk sekula peraimeri. Udah nasit udah selatan renggat ke empat.

Saturday, January 21, 2006

Terubah Ngelala...

Rarih ripih udah nasit, udah selatan renggat kedua dalam kenang pengarang.
Masuk sekula peraimeri satu di menua ulu kelia ukai baka ke diatu deh. Nurun bejalai kaki nyau baka ti belumba enggau pemansut matahari laban enggaika ditinggal ke luching pengajar berengkah ngajar. Kukuk manuk kelabu entebalang bangku kepayang banda gerunggang, kukuk ijau kunchit labang ensulit banda pipit asai ti agi tetaing didinga pending ayas nampung didinga. Tu meh maya, penerubah iya bepansa mua enggau tudah apai.
Wah..wah..wah..narit seput nengkadah..naka meh penyigat urang tuai deh! Sigi patut tau digelar manuk tajai betisik bidik mayuh ambai. Asss enda sempat nyeremin diri mega maya nya deh tudah aki..ni nemu engka bisi puni getah ai penyigat enda begamal jai..hehehehe. Engka nya sigat laban perenching baju mansau besurik mirak dalam ti di gaga ba takai madang engkerebai tedai belabuh pungga bebali belumpung kini. Sigi baka gaya urang kerja perintah kenu ku jaku ga nyeling nyeling enda berani merening. Bisi sekeda madah bekerja ba CID, bisi mega sekeda madah ba SB ari soldadu army..enda meh nemu tang engka amat Special Branch unit askar soldadu renjer kini. Jilis asai ati aki kelia meda gaya urang bepengawa bakanya hahhah.
"Nya apai nuan sanu," telai bala sekeda nembiak bukai ke tuai tuai lebuh begulai bejalai ngitung pemayuh batu jalai mansang nurun sekula. Hmmm.."Lapa nuan enda nanya iya dulu deh," munyi bala ti jenaka mimit. Tak enda berasai tudah aki nyaut, laban ti sigi pama penangka. "Lapa iya enda nanya aku deh? Enti urang nanya kitai nyaut. Enti urang enda nanya, kitai diau aja. Enti urang mansa, anang belalai," munyi sembur kechepur tudah aki Gerubi. Ah..nyau rarah bulu kubah, nyau tumbuh bulu nyumbuh baru ngelala! Udah nasit, udah selatan...
Pikir enggau runding, tajapan baru serandu buah rampu, setaun buah entimun..enti dirujak belai dikerauh perisi, endang sigi nyelai. Aki Gerubi enda kediri laban diatu puas ngemataka pengamat nasit bakatu nyadi ba nembiak bukai ti ngempu nasit sebaka. Dipansik ditilik mensia bepelajar tinggi nasit atur petara ti tau nudung ngelindung, tau nyakal nyuruh nikal bakatu. Tajapan bakanya, dini deh lebih ari peneleba serta benasit ngasai deh! Sigi tau amai nyuruh isin darah bepusin. Multiply pengisin diri enggau seratus, nya meh penyampau pengerindu enggau penyayau urang ke kitai...Nama mula! Udah nasit, udah selatan.

Monday, January 16, 2006

Udah Selatan..

Enti kitai bekenangka pendiau serta jalai ditengah diterujah kitai ari mit sampaika kitai tuai, naka pemayuh penanggul ti tau nyuruh ngechul mai mantul nadai penunga nunga. Udah nasit, engka ukai selatan kitai bependiau menyana idup begaya!! Not.
Nadai siku kitai mensia, kelebih agi kitai ti baru ngerembai baka bulu tajai baru ngerembang berangkat bujang tu enggai idup bisi indai meruan apai. Engka udah sumpah udah tuah nasit tua digenggam petara. Udah nasit, ukai selatan tua idup begembar dua!

Kelia tak ulih itung batang idung enggau tunjuk kaki tunjuk jari penyampau anak mensia ti ngembuan nasit timpang idup nadai apai tauka nadai indai. Nya meh dipesemaka urang baka anak ampang! Diatu tak nyau bejumbuh naka pemayuh anak mensia ti nyandang migang nasit timpang bakatu. Bula kitai nyebut, nyau sekayu jalai pemanjai enti berintai setaun bedau ulih datai enti nemuai. Mayuh pampang mayuh puntang dipelabaka kitai meh mai nasit bakatu tau labuh ninggang. Bisi sekeda nya ditinggalka apai tauka indai nyenguk neraka tama serega laban umur tak pandak baka chugak butuh lalang. Ukai selatan berumur panjai bejanggut tuai meh nya. Bisi sekeda nya ditinggalka apai tauka indai lesi bebadi napi peluru leka senapang ngetanka menua ari serang. Nadai mega ngawa laban benama tampak rita baka raja kebal menua tau perang. Bisi di ambi nyadi leka kenang jaku peransang kitai malam siang.
Ari pemayuh akal penyampau tegal, ti enda tentu nyamai dipeda mata urang tu beserara agi muda ngunjungka anak merinsa. Ketegal penyayau enggau pengerindu ka pangan diri udah leju nadai cinta beserara seribu gaya..akaiii daiii engkakai aku tu ngasaika pemedis bala anak dudi hari deh apai..ohh indai..so say raja ribai oh why oh why? ketegal kita kami merinsa! Di pejakuka urang enda berasai, ke disepi ngerimbas sekali di asai sigi enda nyamai. Udah nasit, ukai selatan kitai idup nyepi penyinu indai pengerindu apai. Nah..what to do? No more I lap you, cinta udah anchur lebur nyadi debu?...Nya meh ku kitai ngenang neh..laban indai ti balat ngechat nyura mua baka engkeramba berambu dara..laban apai ti seruran ngepai bye bye ninggalka indai gagit biak ngiga ambai lalai pemerindang bala temuai...laban darah ti agi gereginsa baka ti lapar enda makai..laban madu nyau rangkai pengerindu udah nadai..lapa enda deh begigaka iya ti perisi ti pelai muda begumpal besai nyadi ambai..enda pia deh akih wai apai?

Aki Gerubi Tuai ga udah ngasai pemedis enggau penyamai idup di dunya tu dikelaungka dikenggaika apai. Ukai nyungkit ukai ngait, ukai ngeruyak ukai ngerebak. Pengamat iya, aku enda kudi enda ransi..udah nasit..ukai selatan blah blah bleep bleep..Tu meh pengaruh ti pemadu bisa ditangkin aku ari mit sampaika aku nadai. Peransang aku ke pemadu besai reti ti aku bagi ngagai bala anak uchu ichit, ichit wit aku ari diatu enggau jemah ila. Betul betul di kena, tu meh ai sumpah ti pemadu ngasi nyadi peransang tulang kami anak ampang. Mangkin timpang mangkin ngerawang ngemanjaika singkang. Enti enggi urang siti enggai kitai dua;enti enggi urang tiga enggai kitai lima! Udah nasit, udah selatan!

Sunday, January 15, 2006

Tempat alai belajar....

Tu meh penerengkah ke terubah alai aki Gerubi nampuk begigaka penemu maya tubuh agi rumpah begirau darah kelia. Naka pemayuh mensia ari pulau lima besegi udah nengah udah ngerenchah serta saum bekunsi palan alai begigaka penemu. Ari ulu ari ili, ari Setrelia, ari kenada, ari Landan, ari Pakistan, ari India, ari Russia benung nyendiaka diri begempuru di menua Paris pegai Peranchis. Ahhh nyau mawa magang meh bala kaban sesaum perabung betuntung kibung tu neh! Bisi chan tu ngabas nerechas tembawai lama kepit ke kanan luit ke kiba ila. heheheh munti besai keladi tuai sigi pama pemiang iya deh ku kitai betundi bejaku begagai.

Nyau pansut ga cherita belalai aki Gerubi Tuai. Nadai mega ngawa iga laban siku anak Iban ti terubah iya ngarika bansa diberi menua Merika bepeluang tau ulih nyengkau juluk ati dulu kelia. Terima kasih Merika. Bakani deka malas budi basa nuan? Mayuh mega kaban kaban ti udah nyadi pemesai nyadi tuai menua diri sida empu..bisi nya nyadi lutor ngeruyakka ngeli nampung gusi, bisi sekeda ahhh nyadi embisseda, nyadi perupisa lutor sekula...ehh enda alah kenang. Nyah udah aku sanggit baka penyanggit bungai ukit merakap dan deh tali penyambung tempuan raja kaban mensia.

Sunday, January 08, 2006

Selamat Betemu T2K6

Sebulan nandan di langit setaun nampun di bukit udah belalang ngejangka tempaun diri ti dikumbai Pintu Dunya GerubiTuai. Baka antu kamba meh tudah diri tak lesap nadai di peda ari madang lemba! OOhaaaa taun baru, juluk ati baru, pendiau baru, gamal baru, semua baru..hehehe nama mula ku kitai! Benung bekarangka berita pinta bala kaban 2005 tu tadi; benung bekalihka nasit, ke enda manah ngambika manah, ke udah manah ngambika manah agi hahahah bad to good, good to better, great to greater. Opppsss nama nya nyau sepiking deh aki? Ah enggaika ludah besembur kurang dilah meku tekangkang. Nama juluk ati taun 2k6? Udah diperundingka lalu bedau nyadi karang kenang.

Mupuk aku....semadi nungkunka dapur.